L’Ischis ma no l’Ischis

L'Ischis ma no l'Ischis
by

Domìniga 17 de Nadale torrat s’adòbiu cun “L’ischis ma no l’ischis”, sa die ammaniada dae s’Istitutu Bellieni pro remunire sos resurtados de sos cursos in Limba sarda fatos in sos comunes de sa provìntiza de Tàtari, Nùgoro e Aristanis. Sos temas de custa tertza editzione, gasi comente in sas àteras duas, sunt sa cultura, sa promotzione linguìstica, de s’identidade e de su territòriu.
Ocannu nos amus a agatare in Martis, in su Tzentru polivalente “Sa tanca de Idda”.
Su programma de sa die est ricu e vàriu: si comintzat a sas 10 de mangianu cun Maria Doloretta Lai Presidente de s’Is.Be chi introduit e coordinat sos traballos, sighit su su saludu de su sìndigu de Martis Tiziano Lasia e de sas àteras autoridades presentes.
Interventos:

Su Diretore de s’Is.Be Michele Pinna nos at a faeddare de Sa limba sarda in su mundu de eris, in sos mundos de oe, in su tempus c’at a bènnere”.

A pustis, sos maistros Maria Doloretta Lai, Daniela Masia Urgu, Lucia Sechi, Francesca Sini, Antonio Carta, Stefano Alberto Tedde, Maria Leonarda Correddu, Adriana Cocco, Immacolata Salis, Anna Laura Pirisi, Ivan Marongiu e Maria Teresa Murgioni ant a cunsignare sos atestados a sos dischentes de sos cursos de Limba e cultura sarda de Tàtari, Martis, Laerru, Biddanoa Monteleone, Marrùbiu, Pàdria, Àldara, Mores, Isporlatu, Urtei, Gelisuli, Lotzorai, Barì, Tortolì e Irbono, de su cursu de Istòria Sarda de Piaghe, a sos piseddos de su Servìtziu Tzivile Civile chi ant collaboradu cun s’Isportellu de Romana, a sos pitzinnos de Ossi, Uri, Ùsini chi ant partetzipadu a su cursu de Istòria de sos giogos de sa traditzione e a sos pitzinnos de Romana chi ant partetzipadu a sa gita “Una die a Santu Lussurzu”.

A posca amus a dare sos prèmios “Si moves sa limba sa Limba ti movet” a sas tres pessones chi ant imbentadu o fatu una carchi atividade de importu mannu pro sa difusione de sa Limba sarda.

A Daniela Masia Urgu, Responsàbile COLCS (Coordinamentu Operadores Limba e Cultura Sarda, tocant sos congruos de sas atividades de su mangianu cun una relata subra “Ojos chi bident no imbetzant. Bìdere pro connòschere, connòschere pro cumprendere”.

Amus a abarrare in su Tzentru Polivalente pro mandigare totus paris cun sas cosas lichitas chi ognunu at a batire dae su territòriu sou.

Sa die at a èssere animada dae sos maistros e dae sos dischentes de s’iscola Tzìvica de Mùsica “Sonos”.

A borta de die amus ammaniadu pro s’ocasione sas vìsitas ghiadas in sardu, a incuru de Angelo Cocco, de sa crèsia de San Pantaleo e de sa Foresta apredada Carrucana. Si partit a sas tres (15).

In prus in s’interi chi si cumprint sas atividades chie cheret podet collaborare a sas atividades de chirca de s’Istitutu Bellieni, respundende a unas cantas preguntas subra “La filosofia nella vita pratica: Filosofia del corpo tra cibo e cura di sé e Filosofia nelle nuove azioni di marketing e l’odierna comunicazione di mercato” e “Nuovi fenomeni di criminalità in Sardegna con particolare riferimento a quelle giovanili: bullismo, cyberbullismo e reati informatici”.

Bos isetamus, in meda!

Share