Attilio Pinna

Cando no est impinnadu in tribunale o a iscrìere (su primu libru suo Giustizia e Perdono l’agatades in sa biblioteca nostra) s’esèrtzitat cun su violinu, trastu chi sonat galu dae in antis de ischire leare pinna in manu. Una passione chi a s’ispessada l’at acurtziadu a su mundu de su Bellieni!

Difatis in su 2009 fiat violinista de sos Archè, grupu tataresu cun unu repertòriu de mùsicas de sa costumàntzia populare. Cumbidados a sonare in su Villino Ricci, in ocasione de sos binti annos de s’Is.Be, aiant detzisu de minimare s’aera istitutzionale e unu pagu tropu sèria pighende in su palcu cun nasos de palliatzu e sena botas. Un’esperièntzia ispassiosa de a beru de sa cale Attilio remonit cun praghere s’ammentu e….ispàsimos chi torrant semper. Semus brullende!

Tra unu sonu e una notìfica, agatat puru su tempus pro lèghere, andare a tzìnema, nadare e fàghere boluntariadu cun Amnesty International e cun sa Comunidade de Sant’Egidio.
Pro issu, comente pro s’Istitutu Bellieni, s’impreu de sas limbas de minoria est unu deretu de s’òmine chi non si podet tocare.

Narat “S’ispera mia pro su benidore est chi totu sas minorias linguìsticas e culturales de su mundu, in cale si siat logu s’agatent, potzant gosare de deretos e de oportunidades, de libertade e de giustìtzia che pare”.