Su ruolu de sos rivolutzionarios e de sos persighidos politicos chin su sennu de oje

Cherinde dare un‘imprenta, una misura, unu pesu a sa poperesa de s‘attenzione culturale in su contu de sas ideologias politicas, soziales e democraticas, paghesa chi caratteritzada divrescios Movimentos politicos de oje, in unu momentu de transizione meda delicadu, e pro affrimmare s‘importanzia chi tiana devere aere sas ideologias in su cuntestu politicu de sos matessi movimentos, amus cherfidu torrare manu sos fattos chi ana dadu vida a unu iscenariu istoricu meda de importu chi andada da su 1793 a su 1812 e chi istoricamente benidi ammentadu chin sa dizione de “Sarda Rivoluzione” o Motos Angioyanos… Unu lanziu de tempus in su cale sun bistados affrimmados, ideologicamente, finas prinzipios de soperanidade abberu de primaria importanzia.

Chircadores modernos, infattis, in s’intentu de arricchire e dare sensu a sos disignos prus beros de s’istoria nostra, ana pensadu de isterrere sas chircas issoro a documentaziones custoidas in archivios finas de ateras naziones. Cherinde affinare, appuntu, sas chircas supra sos chi si costumana de giamare, “Motos Angioyanos”, e supra sa costanzia de s’attividade politica de Giommaria Angioy, animadore e capu de su Movimentu, s’este pensadu de ricurrere finas a sos archivios franzesos. Gusta ipotesi est bistada cunsizada da sa zertesa chi Angioy, ancora essende in Sardigna e pustis essende foressidu politicu in Parigi, aerede tessidu rapportos chin su Guvernu repubblicanu de sa Franza.
Su materiale agatadu in cussos archivios, meda interessante pro sa cantidade e pro sa calidade de sa documentazione, giuttende lughe noa a s‘iscuru de unu momentu istoricu de grande importu, ada cunsentidu de torrare manu sos giudizios postos umpare da sos istoricos de sa prima ora.
Su cursu nou de sas chircas e de sos istudiosin su meritu de sos fattos chi ana caratterrtzadu sos Motos Angioyanos, tendede in particolare a atzertare si su cuntestu ideologicu de su Movimentu, in prus de sas iscontadas cuntestaziones contra sas opprimentes e ingiustas regulars feudales, esserana presentes finas prinzipios ideologicos de libertade, de emancipazione soziale, de soperanidade, accoraggidas da sas currentes noas de pensamentu ispartas a tottu sos bentos da sa Rivoluzione Franzesa. Unu lanziu de tempus in su cale sunu bistados affrimmados ideologicamente, finas traguardos de soperanidade abberu de primaria importanzia.
Sa dignidade, sa frimmesa, sa sardidade posta in essere da Giommaria Angioy sunu unu patrimoniu culturale e politicu de primaria importanza, duncas, lu devimus sempere preziare e tennero contu.
A custa ispuligada chi amus seperadu de iscriere in limba sarda, amus cherfidu dare unu carattere gasi romanzadu seperende de dare sa paraula a divrescios pessonatzos, in particulare a Angioy pro azudare a faghere giaresa in sos fattos chi ana caratteritzadu unu tempus istoricu de grande importu, e tottu custu, si cumprendede, sena traighere sa veridade istorica. Sos pessonatzos, infattis sunu tottu autenticos.
Su limbazu impreadu este su logudoresu centrale, prus a mancu su chi si faeddaiada cando sunu sutzessos sos fattos chi amus illustradu.