Su 15 de Santandria 2025, Martis at a istrangiare sa de VIII editziones de “Martis in Poesia”, manifestatzione promòvida in su cuntestu de su Fèstival Literàriu Ethnos, paris a s’assòtziu Èlighe, organizadore de su Fèstival, e s’Istitutu Camillo Bellieni, cun su patrotzìniu e contributu de su Comune de Martis.
S’abboju at a èssere in su Museu Paleobotànicu de Martis, in Cursu Umberto I n. 12, dae sas 5 e mesa de sero, e at a èssere dedicadu a su tema de sa gherra, chi essit a campu in formas medas: tra pòpulos, tra indivìduos, comente lota interiore.
Sos interventos de sa serada ant a èssere curados dae Daniela Masia Urgu e Lucia Sechi – operadoras Is.Be – chi ant a aprofundire su tema de sos conflitos chi nde essint a pizu pro sa valorizatzione de sas limbas, e Immacolata Salis – operadora Is.Be – chi at a presentare s’ùrtimu libru de s’intelletuale, iscritore e ativista de sa Limba Sarda Giuseppe Corongiu: “Gherras”, regorta de contos chi isforrojant in sas intragnas de sa cunditzione umana, intritzende sas cuntierras – cussas de sas gherras de a tesu, cussas ìntimas de sos silèntzios familiares, cussas de ogni die in su tzilleri– cun un’istrumentu, sa Limba Sarda, chi est isse e totu cuntierra.
Programma de sos interventos
- “Gherras e limbas. Meledos, cantos de ispera e promotzione de fainas de bonu cumprou”, a cura de s’Is.Be, cun Daniela Masia Urgu e Lucia Sechi
- Presentada de su libru “Gherras” de Giuseppe Corongiu a incuru de Immacolata Salis operadora Is. Be.
Bos isetamus pro bos aunire a s’abbboju nostru, chi at a segugiare sa riflessione, cunfrontu cun sas timòrias pròpias e preguntas subra s’identidade, sarda e universale. S’eventu naschet a intro de su Fèstival Literàriu Ethnos, comente atu de resistèntzia culturale chi si faghet literadura.
Info eventu:
Martis in Poesia: a sas 5 e mesa de sero, Museu Paleobotànicu de Martis
Pro nde ischire de prus:
istitutobellieni@gmail.com
079 230268 lun. – mèr. – chen. h 10.00 – 13.00
