Isportellos Linguìsticos - Istituto Camillo Bellieni Sassari

#Limbas #Logos Isportellos Linguìsticos

Sos isportellos linguìsticos, pro mèdiu de sos operadorespròpios, contivìgiant sas tradutziones dae s’italianu a su sardu de materiales amministrativos comente delìberas, regulamentos, ordinàntzias comunales, lìteras de su sìndigu; ma puru de documentos o àteros iscritos chi sos tzitadinos lis sutaponent.

In prus de sas atividades de tradutzione, sa punna de sos isportellos linguìsticos est de indanimare su territòriu cun progetos e acadessimentos culturales e de promotzione de sa limba pro mannos e minores.

Chi est s’operadore e ite faghet

S’operadore linguìsticu e culturale s’òcupat de s’animatzione de su territòriu in limba sarda: promovet e organizat laboratòrios, cursos de formatzione, agiudat sos assòtzios chi òperant in su territòriu a manera chi sa limba sarda siat, cantu prus si podet, impreada a manera fitiana.

In prus contivìgiat sa tradutzione de sos documentos de s’amministratzione dae s’italianu a su sardu.

S' Isportellu Linguìsticu de s'Is.Be in Tàtari

Dae paritzos annos puru in s’Istitutu Bellieni in Tàtari est ativu un’isportellu. S’isportellu est a indonue abertu a totu sos tzitadinos chi desìgiant de s’acurtziare a sa limba sarda o chi ant bisòngiu de agiudu pro iscrìere in sardu o pro tradutziones dae su sardu a s’italianu e dae s’italianu a su sardu..

Su servìtziu de suportu e consulèntzia linguìstica s’acumprit in presèntzia in sa sede nostra in carrera Maddalena 35 in Tàtari o puru online.

Sas operadoras ant a èssere disponìbiles in ambas modalidades dae su lunis a su chenàbura dae sas 10 a sas 13.
Pro leare un’apuntamentu o rechèdere sa consulèntzia online iscrìere a istitutobellieni@gmail.com