S’Amministratzione Comunale de Pàdria, in collaboratzione cun s’Istitutu nostru, at praghere de bos fàghere ischire de sa presentatzione de su libru “PADRIA – Storia di una comunità attraverso le deliberazioni degli organi consiliari (1950-2025)”, ammaniadu dae s’archivista Stefano A. Tedde.

S’adòbiu at a èssere sàpadu 13 de làmpadas de su 2026, a sas 5:00 de sero in sa Sala de sas cunferèntzias de su Cumbentu Frantziscanu betzu.

Su progetu

Su libru at sa punna de costruire a nou s’istòria reghente de Pàdria, una bidda antiga de sa regione istòrica de su Meilogu, impitende una manera non connota e documentada: sas “boghes ufitziales” de sas deliberatziones de su Consìgiu e de sa Giunta comunale partzidas mandatu pro mandatu, Sìndigu in fatu de Sìndigu.

Cun s’anàlisi de custos atos, s’istùdiu – arricchidu dae una documentatzione fotogràfica manna – torrat su ritmu de sa vida de onni die e de sas mudaduras mannas chi ant interessadu sa bidda pustis de sa segunda Gherra Manna finas a dies de oe. Dae sos annos difìtziles pustis de sa Gherra a s’isvilupu econòmicu, atraessende sos fenòmenos  de s’emigratzione e de sas mudaduras demogràficas, su libru oferit unu puntu de annotu sentidu subra de un’istòria locale capatze de fàghere a bìdere, in manera minimada, sas mudaduras istòricas mannas de su Noighentos e de oe.

Programma de s’adòbiu

A borta de die s’at a comintzare cun sos Saludos Istitutzionales de:

Alessandro Mura – Sìndigu de Pàdria

Pangela Dettori – Assessora a sa Cultura de su Comune de Pàdria

Maria Doloretta Lai – Presidente Is.Be

Ant a sighire sos interbentos de:

Lucia Sechi – Operadora linguìstica de su territòriu, chi at collaboradu a manera ativa a chircare e annotare sos documentos de s’archìviu.

Stefano Alberto Tedde – Archivista e autore de su libru.

Custa initziativa rapresentat unu tretu de importu in su percursu de valorizatzione de su patrimòniu de s’archìviu e de s’ammentu istòricu de su territòriu, chi nos bidet comente Istitutu paris a s’Amministratzione comunale semper in prima lìnia.

 Semus cuntentos de bos cumbidare a partetzipare.