Un appuntamentu ippiziari pa’ turrà a ischubrì lu liammu forthi tra la ziddai nosthra e la festha soia più manna. I’ la marabigliosa guarnizi naruraristhigga di lu Giardhinu di l’Archibiu Isthoriggu Cumunari “Enrico Costa” (in via Insinuazione 31) abarà a andà in scena un viaggiu letterariu e linghisthiggu tuttu dedicaddu a li Candareri.
Chisthu attoppu abarà a assé propiu la dì 14 di triura, pa’ fuimà un ponti ideari cu lu mesi chi sighi, candu la dì 14 tutta la ziddai s’abarà a aunì pa’ la festha tradiziunari e assai aisittadda di la faradda di li Candareri.
Sott’a la ghia pratigga di lu masthru Mario Lucio Marras, l’ischurani di lu Corsu di linga sassaresa abarani a dà bozi e vidda noba a li versi chi ani ziribraddu chistha tradizioni securari. Abarà a assé un caminu accisadori pa’ assaurà la biddezia di lu fabeddu nosthru zittadinu e ischudrugnà da affaccu l’evoruzioni chi la so’ grammatigga e lu so’ raccontu ani vividdu drent’a un securu e più.
In chisthu attoppu, la memoria isthorigga e la sensibiriddai muderna s’abarani a intriccià liggendi li parauri di ca à sabuddu cantà a Sassari cun autentiziddai. Cussì abaremu a vibì un raccontu corari chi aùni li penni isthorigghi e sempri vibi di Pompeo Calvia, Salvator Ruju, Paolo Galleri e Cesarino Mastin, finza a arribì a la sensibiridda puetigga di Rosilde Bertolotti, Dino Siddi, Paolo Sanna, Giuseppe Florenzano e Cinzia Cossu. No abarani a mancà li puisii più nobi di Antonello Bazzu, di Mario Lucio Marras, Gildo Motroni, Tino Grindi, Anna Lisa Noce e Palmiro De Giovanni appugliendi a lu prubbiggu una panoramica ricca e piena d’emozioni.
A fà l’aria ancora più bedda abarà a assé lu priziosu contributu acusthiggu e musiggari di lu cantautori Beppe Dettori.
Parthicurari di l’eventu
- Candu : Marthi 14 di triura 2026, a li 6 a parthi in sera
- Undì: Sassari, Giardhinu di l’Archibiu Isthoriggu Cumunari “Enrico Costa” (Via Insinuazione 31)
- Intradda: libbara e indibadda
Pa’ cassisia infuimazioni zi pudiddi cuntattà a l’indirizzu istitutobellieni@gmail.com. Viniddi umpari a noi pa’ turrà a ischubià umpari li radizi nosthri cu’ la fozza di la paraura e di la musigga! V’aisittemmu!
