Butega de fainas pro sa vida de onni die
«…Difatis, sos òmines ant incumentzadu a filosofare, tando comente oe, pro s’ispantu…»
Su fraile de sa filosofia de s’Istitutu de Istùdios e Chircas “Camillo Bellieni” tzèlebrat su traguardu de sos primos deghe annos de atividade.
Deghe annos a oe naschiat su Fraile de sa Filosofia, su primu laboratòriu de filosòfia pràtica promòvidu dae s’Istitutu de Istùdios e Chircas “Camillo Bellieni”. Dae tando cussu primu nùcleu de chirca est crèschidu finas a diventare una comunidade de pessones chi sighit a si fàghere dimandas subra de su presente pro mèdiu de s’arresonu, sa pràtica filosòfica e sa cumpartzidura de sas esperièntzias.
In custos deghe annos su laboratòriu at promòvidu seminàrios, cunferèntzias, cunvegnos, laboratòrios, atividade de grupu e percursos de pràtica filosòfica, dende vida a una comunidade chi at fatu de su cunfrontu e de su meledu trastes de crèschida personale e de totus. Unu caminu chi at atraessadu temas comente s’amore, s’arte, su sacru, sa bellesa, su tzìnema e su paesàgiu, in su cumbinchimentu chi sa filosofia potat galu oe dare trastes pro cumprèndere sa cumplessidade de su presente e vìvere cun prus consièntzia.
Pro tzelebrare custu anniversàriu gasi de importu, chenàbura su 31 de trìulas de su 2026, a sas 6 de sero, su Parco delle Arti Molineddu de Ossi at a istrangiare una serada dedicada a su contu de custos primos deghe annos de atividade.
Pro mèdiu de unu vìdeo-contu e sas testimonias de chie at cumpartzidu custu percursu, torramus a atraessare su caminu de su Fraile de sa Filosofia, ammentende sas esperièntzias, sos abojos e sas pessones chi ant contribuidu a ammaniare una comunidade de pensu aberta a s’arresonu e a sa chirca.
In sa serada at a èssere ammentadu Micheli Pinna, chi cun su pensu e sa sensibilidade sua at acumpangiadu sa crèschida de su Fraile de sa Filosòfia. L’amus a ammentare cun unu de sos meledos suos de prus importu:
«Pensare no est cosa de fàghere a sa sola, ma un’esertzìtziu de contivìgiu chi istràngiat sa cumplessidade de s’esistèntzia e la mudat in un’ispera cumpartzida»
Programma
SU FRAILE DE SA FILOSOFIA: DEGHE ANNOS DE PENSOS
Butega de fainas pro sa vida de onni die
- Acullièntzia de sos partetzipantes.
- Vìdeo-contu dedicadu a sos deghe annos de s’Ofitzìna Filosòfica.
- Testimonias e contu de su percursu de chirca pro mèdiu de sas boghes de chie at cumpartzidu custa esperièntzia.
- Omàgiu a Micheli Pinna.
- Chena filosòfica cun su chi onniunu si giughet.
Informatziones ùtiles
📅 Data: Chenàbura su 31 de trìulas de su 2026
🕕 Oràriu: A sas 6 de sero
📍 Logu: Parco delle Arti Molineddu – Ossi
