Micheli Pinna

In su 1989 fundat s’Istitutu de Istùdios e Chircas “Camillo Bellieni”, de su cale oe est su Diretore Iscientìficu, pustis sa rivista Sesujae dae carchi tempus s’ “Officina filosòfica” de s’Is.Be cun sos Laboratòrios de Filosofia Pràtica.

Narat chi puru a Dolores, sa Presidente, l’at inventada issu, “so cussiente chi chirchende de l’imparare carchi cosa nd’apo fatu unu mostru. Ispero chi non torret in se e finet de mi tènnere in cunsideru”.
Pro 40 annos at insinnadu Filosofia, Istòria e Literadura, puru si creet de no àere imparadu mai nudda a nisciunu.

Dae cando b’est s’Is.Be at semper giogadu a ammaniare mundos bidos in bisu in sas pasadas chi non podiant mancare posca de àere bustadu. Trintatres annos de giogos leados a cunsideru a manera sèria, comente faghent sos pitzinnos. Forsis tra un’àtera trintina de annos, at a comintzare su tempus de sos contos e at a èssere de a beru longu meda. De su restu su Professore non nd’at de presse, issu non traballat pro s’istòria ma pro s’eternidade.

S’espressada preferida? “Isperemus de mi sarvare”.