Domìniga 22 de santandria de su 2026, a sas 10:30 de mangianu, in Tàtari – “Orti di San Pietro”, s’Istitutu de Istùdios e Chircas “Camillo Bellieni” s’at a agatare pro “L’Ischis ma no l’Ischis”, s’abboju est dedicadu a ammustrare totu sas atividades acumpridas intro de s’annu. At a èssere s’ocasione pro torrare a fàghere unu caminu ricu de initziativas, incontros e progetos chi ant intritzadu formatzione, chirca, meledu filosòficu e valorizatzione de su patrimòniu linguìsticu e culturale de sa Sardigna.
Su programma 2026 de s’Istitutu at dadu logu meda a sa formatzione linguìstica e culturale, cun su Cursu de Limba Tataresa – Livellu Avantzadu e su Cursu de Limba tataresa – Livellu B1, ambos in Tàtari, a faca de sos Cursos de Limba e Cultura Sarda – Livellos A1 e A2, propostos in sas sedes de Tàtari e Nùgoro, e dae su Cursu de Istòria de sa Limba Sarda, realizadu in Tàtari. A custos caminos s’est annantu su laboratòriu teatrale pro mannos “Tuttu S’acconza”, un’esperièntzia chi at giutu sa limba tataresa in palcu e chi si est congruida cun sa rapresentatzione teatrale de sa cummèdia cun su matessi nùmene de su laboratòriu.
Sa limba e sa cultura sarda e tataresa sunt istadas sas protagonistas puru de initziativas pùblicas medas. Dae sa “Festa della Gobbula”: su Carrasegare in limba tataresa in s’eventu “Paràulas in Musica”, passende pro su “Maggio Sassarese 2026”: tziclu de seminàrios subra sa Literadura Tataresa, s’Istitutu at promòvidu ocasiones de incontru e aprufundimentu dedicadas a sas espressadas culturales de su territòriu. A custas si sunt annantos sos abbojos “I Candelieri nelle poesie degli autori sassaresi” e “Giornata internazionale della Lingua Madre e Giornata europea delle Lingue”: afinidades e obietivos, initziativas chi ant contribuidu a mantènnere bia s’atentzione subra sa pluralidade linguìstica e subra su valore de sas limbas comente patrimòniu cumpartzidu.
Su raportu intre sa memòria, istòria e identidade at àpidu logu puru in sos Seminàrios de aprofundimentu subra Camillo Bellieni, dedicados a sa figura a sa cale s’Istitutu est intituladu, e in sas presentatziones de publicatziones noas. Intre custas, “Sesuja n. 7” e “Quaderni di Filosofia n. 6”, ocasiones pro cumpartzire cun su pùblicu sos caminos editoriales e de chirca. A cumpletare su programma culturale sunt istadas sas initziativas comente “Martis in poesia – IX edizione” chi at postu s’atentzione subra connessiones intre sa bidda e su paesàgiu, sa poètica de s’ispàtziu e sa costrutzione de su patrimòniu culturale e tzivile.
Su meledu filosòficu at rapresentadu un’àteru àmbitu de atividade de importu. In Tàtari s’est acumpridu su seminàriu “Filosofia dell’amicizia e dell’amore”: anàlisi de sos raportos intre pessones, mentres in Aristanis su cunfrontu s’est isvilupadu a inghìriu de su tema “Conosci te stesso nell’era digitale”: identidade e autentitzidade intre social e màscaras. Dae s’algoritmo-oracolo a s’iscoberta de s’atopos socràticu. A faca a custos apuntamentos si sunt isvilupados su “Book Club” e suBook Club filosòficu, logos dedicados a sa letura, a sa cumpartzida e a s’arresonu.
Ocannu, s’”Officina Filosofica” s’Istitutu de Istùdios e Chircas “Camillo Bellieni” est lòmpida a sos primos deghe annos de atividade, unu resurtadu chi testimoniat sa continuidade de unu percursu dedicadu a su pensu crìticu e a su cunfrontu culturale. In su programma b’est istada puru sa presentatzione de “Figure politiche per il futuro dell’Europa” e su cunvegnu “Le implicazioni filosofiche e giuridiche nell’opera di Giorgio Asproni”, cunfirmende s’atentzione de s’Istitutu a su pensu polìticu, s’istòria de sas ideas e sas chistiones chi atraessant sa sotziedade in dies de oe.
A faca a sas initziativas organizadas a manera dereta dae s’IS.Be, su contu de su chi est istadu fatu at a incluire puru sas collaboratziones a foras de s’Istitutu e sa partetzipatzione a momentos de cunfrontu promòvidos dae àteras istitutziones. Intre custas, sa Summer School Pensare il/al femminile, chi s’est acumprida in Gavoi dae su 10 a su 12 de cabudanni e su seminàriu promòvidu dae s’URS pro sa Sardigna.
Unu cuadru prus cumpridu de s’atividade annuale at a èssere ofertu puru dae su traballu de sos duos Osservatòrios de s’Istitutu, sas initziativas de chirca, aprofondimentu e documentatzione de custos ant a agatare logu in su contu paris a sas atividades acumpridas in su 2026.
Sa die L’Ischis ma no l’Ischis at a èssere puru s’ocasione pro cunsignare sos atestados a sos partetzipantes de sos cursos e de sos percursos formativos congruidos in s’annu e pro bìdere, pro mèdiu de immàgines e vìdeos, sos momentos de sas initziativas realizadas chi ant prus significadu.
Un’apuntamentu pro cumpartzire su traballu fatu, valorizare sas esperièntzias isvilupadas e reconnòschere su contributu de cantos ant partetzipadu a sas atividades de s’Istitutu, cunbintos chi sa limba, sa cultura e sa chirca rapresentent trastes de importu mannu pro mantènnere biu su ligàmine cun su territòriu e ammaniare ocasiones pro crèschere paris.
