Maria Leonarda Correddu

Dae su traballu in sos ufìtzios linguìsticos comunales e in sas iscolas a sa promotzione de su territòrio, dae su contivìgiu de issa matessi cun passigiadas longas (mègius in su mare) a su contivìgiu de sas relatziones sotziales suas, de sa famìllia e de sos amigos.
Li praghet meda biagiare, cando podet, osservare e ascurtare sas pessones. E li praghet meda lèghere. Cale si siat cosa e de cale si siat genia, ca sa connoschèntzia nos faghet lìberos.

Mancari sos milli impinnos e passiones suas resessit a agatare su tempus pro atividades noas cun s’Is.Be (cun su cale collàborat a manera ativa dae su 2006) e mescamente pro sas pessones chi partètzipant a sos cursos de Limba sarda.

Maria Leonarda contat cun praghere in particulare una connoschèntzia, capitada in su 2020, in su pienu de sa “pandemia”. Mancari sas dificurtades a acumprire a sas atividades de formatzione a manera traditzionale, sa modalidade “online” at dadu sa possibilade de segudare medas pessones de a beru chi istant fora de sa Sardigna: sardos chi non cherent pèrdere s’identidade issoro; e foristeris chi disìgiant connòschere sa cultura nostra e imparare sa limba nostra.

E est pròpiu cun una corsista sarda, chi oramai dae tempus meda istat fora de s’ìsula, chi, est nàschida una bella amigàntzia. Onni sero, finidu su cursu, tra issas sighiat su cullegamentu skype, chistionende, tra una risada e s’àtera, de cussa chi in antis pro su prus fiat sa vida in famìllia, in su bighinadu e in sa bidda e de comente in su tempus totu custu siat mudadu; ponende paris sos ammentos e sas costumàntzias de sas duas biddas issoro.

S’ispera sua est si fatzant sessare sas dies de solu ammentu de sa limba sarda, chi balent su chi balent, e chi sa limba nostra a manera definitiva intret in sa vida fitiana de totu nois.