Daniela Masia

Dae su 2002 Daniela collaborat cun nois, in antis comente operadora e indanimadora linguìsticu-culturale e posca a intro de s’”Officina Filosòfica” in ue faghet, paris cun Professor Pinna, sos seminàrios de Filosofia Pràtica.

Daniela, difatis, una vida tra Bosa, Casteddu e Terraba, pustis de s’èssere laureada in Filosofia est diventada puru fatzilitadora de sas pràticas filosòficas.

Sa curiosidade manna chi at li cunsentit de isperimentare in àmbitos a manera aparente diferentes ma in sa realidade aunidos dae un’elementu fundamentale: sa vida in s’essentzialidade sua. S’apentat a coghinare, pro connòschere gasi sas raighinas de sas culturas; l’interessant sas limbas comente fenòmenos chi mudant a manera sighida e ispigru de sa realidade. Sena ismentigare s’istòria e sa polìtica. Pro non si fàghere mancare nudda est puru dotzente, traballat in su setore de sos servìtzios e est sa Presidente Provintziale de sas Acli de Aristanis.

Nos contat chi in su 2003, in un’atividade de formatzione pro sos dipendentes de sas amministratziones comunales, unu dischente de su cursu non resessiat a atzetare chi su sardu suo aeret dèvidu tènnere contu pro s’iscritura de sas règulas ortogràficas, cumbintu chi l’aerent altaradu. In finitia de su cursu l’aiat naradu gasi ” Dottorè, gia bi l’at fata a mi mi nche las fàghere intrare in conca cusas règulas si puru pro iscriere ebbia sos atos e sos mòdulos de su comune andat bene totu, m’at fatu lezere finas in campidanesu chi mai mi l’aiat mancu pensadu. Ma deo su sardu meu non l’apo mai a traìghere”.

Sa cosa prus difìtzile est fàghere a cumprèndere chi, si sa limba faeddada at sa richesa prus funguda chi nisciunu devet e podet mai mortificare, s’iscritura pro fortza devet sighire unu còdighe istandard. Ma Daniela non si perdet de ànimu e sighit cun frimmesa in sas atividades de formatzione, e, comente si narat, la leat cun filosofia.