Sa màchina organizativa de su Bellieni

S’Istitutu Bellieni est comente chi siat una famìllia in ue cada unu contivigiat sa faina sua in cunforma a sos istùdios chi at fatu, a su chi ischit fàghere mègius e a su naturale sou.

B’est chie faghet chircas in archìviu, chie leghet sos libros essidos a ùrtimu, chie ammaniat sos materiales didàticos pro imparare sas normas ortogràficas, chie faghet sa maistra in sos cursos de sardu, de istòria de Sardigna, de poesia, de cultura sarda bida dae sos ogros de sas fèminas, chie mantenet sa tratàntzia cun s’imprenta, chie faghet publitzidade a sas initziativas in sos social, chie faghet sumateriale gràficu,chie est presente in sede a disponimentu de su pùblicu e chie faghet in manera chi totu custu andet comente si tocat e cada unu potzat traballare in paghe e serenidade!

Custu est su chi fato deo, custu est su chi so. Pro fàghere su traballu meu de organizadora culturale bisòngiant funtziones esecutivas bonas e fintzas cumpetèntzias sotziales, culturales, tècnicas e pràticas.

Ma ite depet ischire fàghere un’organizadore culturale?

1) Dare atentu a s’atividade chi tocat de fàghere cun mente firma fintzas a cando su traballu no est finidu sena pònnere cabu a disvios.

2) Ischire impreare bene su tempus, una sabidoria chi permitit de cumprèndere chi su tempus est colende ma chi permitit fintzas de fàghere in su momentu pretzisu! “Non est a si nde pesare chitzo su mangianu est a intzertare s’ora”.

3) Tènnere a mente informatziones fintzas a cando serbint, custu permitit de acumprire atividades matanosas sena si ismentigare nudda. Fintzas a finire un’atividade tocat de mantènnere artu s’atentu e s’energia

4) Èssere prontos a cambiare si b’at netzessidade, modificare sos programmas in cunforma a sas cunditziones chi si presentant.

5) Iscumbatare si tocat de mudare carchi cosa pro lòmpere a s’obietivu.

6) S’emotividade cheret ischida gestire pro non ruere in atrividas de si nde impudare.

Comente si organizat un eventu culturale?

Nois de su Bellieni tzucamus dae ideas, las meledamus totu paris e pustis custas ideas benint a èssere progetos. Gasi naschet su programma de sas atividades, su calendàriu e sas iscadèntzias chi cherent rispetadas.

Detzisu custu si comintzat a fàghere.

A primu bisòngiat ativare sos protzessos netzessàrios pro acumprire s’atzione (cursu, cunvegnu o laboratòriu chi siat) si bi ponet aficu e atentu fintzas a acumprire su traballu lassende a banda su chi podet bogare dae filu.

Tocat de gestire su tempus. Pro nàrrere: ammaniende unu cunvegnu tocat de faeddare cun tempus sos reladores e su logu, prenotare su biàgiu in aèreu e s’hotel pro sos istràngios, preguntare a sos reladores su tìtulu e cantu at a durare sa relata issoro; dare a ischire a s’addetu a s’imprenta su tìtulu, sos obietivos e sa die de su cunvegnu, sos nùmenes e su curriculum vitae de sos reladores, incarrigare su gràficu pro sa locandina in cunforma a su chi est detzisu, programmare sa publicatzione in sos social e in su situ internet e in su matessi tempus contivigiare s’imprenta in tipografia de sos materiales (brochure, locandinas, rollup).

Tocat de tènnere a mente cada informatzione ùtile, sas iscadèntzias, sos cuntatos, su chi b’est galu de acontzare, in un’àndala chi mudat semper e in ue non giuat a si pèrdere.

Si diat èssere netzessàriu tocat de mudare oràrios, tempos, programmas, mesurende cada borta ite e comente fàghere pro megiorare su resurtadu. Semper in serenidade, sena aconcadas.

Carchi die in antis de s’eventu est netzessàriu andare a bìdere chi cada cosa siat in òrdine e funtzionet (micròfonos, vìdeu proietore), sa die de s’eventu lòmpere a su nessi un’ora in antis de comintzare pro acontzare sas ùrtimas cosas e retzire sa gente.

Una borta comintzadu sighire totu cun atentu ca, mancari sos tempos, sas responsabilidades e sos còmpitos siant giai definidos, podet capitare un’isrobu, mannu o minore chi siat.

Acumpridu s’eventu cun unu comunicadu a s’imprenta si dat a ischire a sos ausentes su chi at sutzessu, si si depent publicare sos atos si collint sas relatas, si dant sa pagas.

Pensade chi custu sutzedet in cada atividade chi proponimus. Comente naraiat Prof. Pinna, “cada borta chi ponimus in motu sa màchina organizativa nostra!”